A ONURI ALL' ARTI TÒ…
(A Pino Riggiu)
Scrivìu n' endecasìllabu spariggiu
pi ttía, me caru professuri Riggiu.
Na iunta di paroli nta na gìstra
a onùri all'arti tò, granni e maìstra.
L' arti di dari lustru a li pinzèri
comu àlbiri, 'n capu a li trazzèri.
L' arti di dari sciàtu a la to' menti.
in donu a lu sapìri di la ggenti.
L' arti d' arritruvari 'u mari e l' ùnna
dintra ogni cosa, ca' nto còri abbùnna.
L'arti di dari vuci a na poisìa.
ntra l'aria ca' si sperdi, pi la vìa.
L'arti c'hai di cantari u tò paisi
ntra un chiòviri di stiddi e paraddìsi;
tra un lúciri di Fròttuli e Casàzzi.
ntra suli, nivi e luna cu i sò sprazzi...
E penzu ora, a' notti nmenzu i lumi
a la to' vita, 'n scùrriri di sciùmi.
A un vèniri di gràzii e di tempesti
di primavèri, di Santi e li so fèsti.
E mmagginannu 'u sonnu to' cchiu' granni
ti vidu, comu un ventu ntra li canni.
Com' un cristianu, dintra a la so' storia
chi mira sempri a Diu e la so gloria.
Ed ora ca passasti a un sacru munnu
in nui u duluri junci, assai prufunnu
Un grazie, a ttia , tra nu pinzèru assortu.
Innanzi a la speranza d' u Risortu.
